Қазақстан Республикасының Ұлттық ядролық орталығында сыбайлас жемқорлыққа қарсы іс-қимылдың өзекті мәселелері талқыланды

Қазақстан Республикасының Ұлттық ядролық орталығында «Адалдық. Ашықтық. Сенім» тақырыбы бойынша сыбайлас жемқорлықтың алдын алу мәселелеріне арналған кездесу өтті.

Іс-шараға Қазақстан Республикасы Мемлекеттік қызмет істері агенттігінің Абай облысы бойынша департаментінің, Қазақстан Республикасы Президентінің жанындағы Мемлекеттік басқару академиясының облыстық филиалының, сондай-ақ Курчатов қаласы әкімдігінің өкілдері қатысты.

Кездесу барысында мемлекеттік орган өкілдері кәсіпорын жұмыскерлеріне сыбайлас жемқорлыққа қарсы іс-қимыл саласындағы мемлекеттік саясаттың негізгі бағыттары, адалдық мәдениетін қалыптастыру, қызметтік әдеп нормаларын сақтау, сондай-ақ ашықтық пен жариялылық қағидаттары туралы баяндады.

Сонымен қатар сыбайлас жемқорлыққа қарсы іс-қимыл жөніндегі қолданыстағы заңнамаға енгізілген өзгерістер, мүдделер қақтығысының алдын алу және құқықтық мәдениет деңгейін арттыру мәселелері қарастырылды.

Іс-шара соңында қатысушылар талқыланған мәселелер бойынша пікір алмасып, кәсіпорын өкілдері қонақтарға мазмұнды кездесу мен сындарлы диалог үшін алғысын білдірді.