FNCA – министрлік деңгейдегі 26-кеңес

27 қарашада атом энергиясын бейбіт мақсатта пайдалану саласындағы ынтымақтастықты үйлестіру үшін Азия-Тынық мұхиты өңірі елдерін біріктіретін Азиядағы ядролық кооперация форумының (FNCA) министрлік деңгейдегі 26-кеңесі өткізілді. 

Кеңеске FNCA-ге мүше мемлекеттердің өкілдері қатысты және ол атом энергетикасын дамыту, ядролық технологияларды жетілдіру, сондай-ақ кадр даярлау мен ғылыми-зерттеу бағдарламалары саласындағы әлеуетті нығайту мәселелерін талқылауға арналды.

Отырыс барысында Қазақстан атынан FNCA ұлттық үйлестірушісі ретінде сөз сөйлеген Эрлан Батырбеков «Атом энергетикасы және ядролық ғылым» сессиясы аясында ел баяндамасын ұсынды.

Өз сөзінде ол Қазақстанның бейбіт атомды дәйекті түрде дамытып келе жатқанын, уран өнеркәсібін нығайтатынын, атом энергетикасының қауіпсіздігі саласында зерттеулер жүргізетінін, зерттеу қондырғыларын конверсиялау жобаларын іске асыратынын, басқарылатын термоядролық синтез технологияларын, сондай-ақ ядролық медицинаны және кадр даярлауды белсенді түрде дамытып жатқанын атап өтті.

Іс-шара соңында Қазақстан адами капиталды дамытуға бейілділігін және тәжірибе бөлісуге дайын екенін растап, FNCA-дің халықаралық өзара іс-қимыл платформасы ретіндегі маңызды рөлін атап көрсетті.